Жобалар туралы ақпараттар

Инфрақұрылымдық даму

Әлеуметтік инфрақұрылымды дамыту негізгі бағыттардың бірі болып қала береді. 2024 жылы осы мақсаттарға 390 млн. теңгеден астам қаражат жұмсалды. Инвестициялар балалар мен спорт алаңдарын салуды, аумақтарды абаттандыруды және Түркістан және Қызылорда облыстарының елді мекендеріндегі көшелерді көгалдандыруды қамтыды. Ауылдық округтерді таза ауыз сумен қамтамасыз ету мақсатында жерасты суларына іздеу-бағалау жұмыстарын жобалауға ерекше назар аударылды.

ТЖ жағдайында қолдау

2024 жылдың көктемінде Қазақстанның батыс өңірлерінде болған жойқын су тасқынына байланысты Қазатомөнеркәсіп қысқа мерзімде зардап шеккендерге қолдау көрсетті. Шұғыл көмектің жалпы сомасы 3 млрд. теңгені құрады, бұл Компанияның төтенше жағдай салдарын еңсеруге қосқан ең ірі үлесі болды. Қаражат бүлінген инфрақұрылымды қалпына келтіруге және халыққа атаулы көмек көрсетуге жұмсалды. Салдарын жою шеңберінде Қазатомөнеркәсіп инфрақұрылымды қалпына келтіру, аумақтарды судан тазарту және өмірлік маңызды объектілерді қалпына келтіру үшін пайдаланылған 120-ға жуық арнайы техника жіберді. Су тасқынының салдарын жою жөніндегі жұмыстарға қатысу үшін Атырау және Ақтөбе облыстарына, сондай-ақ Орал қаласына ерікті негізде Атом холдингінің 93 қызметкері барды.

Қайырымдылық бастамалары

2024 жылы қайырымдылық жобаларына 340 млн. теңгеден астам қаржы бөлінді. Бұл қаражат аз қамтылған және көпбалалы отбасыларды, ерекше қажеттіліктері бар балаларды, зейнеткерлер мен ардагерлерді қолдауға бағытталған. Іске асырылған іс-шаралар шеңберінде азық-түлік, көмір, киім-кешек, мектеп керек-жарақтары сатып алынып, табысталды. Сондай-ақ балаларды емдеуге қаржылық көмек көрсетілді, мерекелік іс-шаралар өткізілді, сыйлықтар табысталды. Интерактивті тақталарды, LED-экрандарды және танымдық басылымдарға жазылуларды қоса алғанда, мектептерді техникалық жарақтандыру қосымша қамтамасыз етілді.

Білім беру бағдарламалары

Қазатомөнеркәсіп білім беру бастамаларын белсенді дамытуда. 2020 жылдан бастап SANA кәсіптік бағдарлау лагері жұмыс істейді, оның шеңберінде компания қызметкерлері шалғайдағы кенттерді қоса алғанда, Түркістан, Қызылорда және Шығыс Қазақстан облыстарының мектептеріне барады. 2024 жылы іс-шараларға 690 жоғары сынып оқушылары қатысты. Жоба жастардың техникалық мамандықтарға және өндірістік салаға деген қызығушылығын қалыптастыруға бағытталған.

Бұған қоса, 2023 жылдан бастап «Murager» білім беру гранттары бағдарламасы іске асырылуда, ол қатысушы өңірлерден келген оқушыларға жоғары немесе арнаулы орта техникалық білім алуға мүмкіндік береді. 2024 жылдың қорытындысы бойынша 19 студент еліміздің жетекші жоғары оқу орындары мен колледждерінде бір жылдық оқу ақысын төлеуге грант алды.