| (AIX)    KZT 18835   %   0.88 USD 37.3   %   -2.38

Асқар Жұмағалиев атом саласы ардагерлерімен кездесті

17 қазан 2016
Асқар Жұмағалиев атом саласы ардагерлерімен кездесті

Ұлттық атом компаниясы басқармасының төрағасы әр жылдары зейнет демалысына шыққан Қазатомөнеркәсіптің бұрынғы қызметкерлерімен кездесті. Атом саласы қызметкерлерінің кәсіби мерекесіне орайластырылған мұндай басқосулар компанияда жыл сайын тұрақты өткізіліп келеді.

Асқар Жұмағалиев айтып өткендей, «бұл - зейнеткерлермен жай жүздесу емес, бұл - атом саласында мол тәжірибеге ие сарапшылармен кездесу. Компанияның қалай дамып келе жатқанын бұрынғыдай қадағалап отыратын олардың көзқарасы біз үшін қашанда маңызды. Оған қоса, әрине, бұл - өмірінің керемет жылдарын компаниямызға арнаған адамдарға деген құрметтің белгісі».

Зейнеткерлерді төл мерекемен құттықтаған Асқар Жұмағалиев Қазатомөнеркәсіп ұжымының үстіміздегі жылы қол жеткізген басты табыстары туралы әңгімелеп берді.

«Биыл біз трансформациялау бағдарламасын іске асырудың белсенді кезеңіне аяқ бастық. Жағдаяттық орталықты іске қосып, «СаУран» кәсіпорнында «Санды кеніш» жобасын жүзеге асырдық. Енді сол жерден өнім өндіру көлемін онлайн режимде бақылай аламыз. Сондай-ақ, Өскеменде отын құрамаларын шығаратын зауыт құру жөніндегі жобаны қолға алдық және «Инкай» бірлескен кәсіпорнындағы үлесімізді 40-тан 60%-ға ұлғайту жөнінде канадалық серіктестермен келісімге қол қойдық», - деді Асқар Жұмағалиев.

Кездесу қатысушылары өндірісті әртараптандыру үдерісін бастаудың маңыздылығын айрықша атап көрсетіп, стратегиялық мақсаттарға қол жеткізуде компания ұжымына табыстар тіледі.

Басқосу барысында ұлттық атом компаниясының басқарма төрағасы келер жылы Астанада өтетін «ЭКСПО-2017» халықаралық көрмесі аумағында серіктестермен бірлесе атом павильонын салатыны жайлы да айтып өтті. Қазатомөнеркәсіп зейнеткерлері көрмені көргісі келетіндіктерін білдірген соң, Асқар Жұмағалиев өз кезегінде оларға «ЭКСПО-2017» көрмесін көрсетуді ұйымдастыруды уәде етті.

Пікір қалдыру